menter@micnpt.org
Menter
Iaith
Castell-nedd Port Talbot
Canolfan y Groes
1 Stryd Fawr
Pontardawe.
SA8 4HU
Ffôn:
01792 864949 |
|
Dysgwyr
Lisa Pedrick + Cwis Criw bach ddaeth ynghyd i glwb ‘Dylan’s’ yng Nghwmafan nos Wener 14eg o Dachwedd ar gyfer cwis i ddysgwyr Cymraeg a’u ffrindiau, a drefnwyd gan Fenter Iaith Castellnedd Port Talbot a Chymunedau yn Gyntaf Cwmafan. Mae’r Fenter wedi canolbwyntio’n bennaf ar ardal Cwmtawe, ond mae’n ymwybodol o’r angen i gynnig gweithgareddau adloniannol i hybu’r Gymraeg yn ardal ehangach, gan gynnwys Port Talbot.
Felly manteisiwyd ar y cyfle i ddod i nabod Cymry Cymraeg a dysgwyr yr ardal. Yn anffodus ‘roedd y dyddiad yn taro yn erbyn Warren Gatland a’i ymdrechion i ddofi’r ‘Cannucks’, ac ymdrech Pudsey i helpu ‘Plant mewn Angen’ – sy’n esbonio’r criw bach siwr o fod.
Alun Pugh, prif swyddog y Fenter oedd y cwis feistr, a lluniau o enwogion Cymreig a rhyngwladol oedd y thema. Heriodd y rownd gyntaf ein gwybodaeth am wynebau cyfarwydd iawn e.e. ‘roedd gwyneb a gorchestion Ryan Giggs yn adnabyddus i bawb, ond faint oedd yn ymwybodol i’w dad chwarae Rygbi’r Gynghrair dros Gymru!; a beth oedd swydd wreiddiol y digrifwr Harry Hill? (meddyg!) Fel pob cwis da, yn heriol a rhwystredig.
Er mwyn gallu ateb unrhyw gwestiwn yn yr ail rownd roedd gofyn bod naill ai’n ddarllenwr brwd o gylchgronnau fel O.K. neu ‘Hello’, neu’n arbenigwr ar ffilmiau, neu dan 25 oed, (neu’r tri ohonynt.) Lluniau o sêr adnabyddus pan oeddynt yn oed ysgol gynradd oedd y thema. Tipyn o job adnabod Brad Pitt, Simon Cowell neu Robbie Williams pan yn blant ifanc. Anodd, ond fe gyflawnodd y dasg o ennyn trafodaeth a dadlau drwy gyfrwng y Gymraeg.
Yn ail hanner y noson, daeth y gantores ifanc o Frynaman, Lisa Pedrick i’n diddanu gyda set acwstig yn llwyr o’i C.D. ddiweddaraf – ‘Angylion yn Chwarae’. Lisa gyfansoddod rhan fwyaf o’r caneuon fel yr anthem i ferched ‘Breuddwydio’ a ‘Mor bell ni’n dau’. Canodd un gân gan y grŵp enwog yr ‘Alarm’, gyda’r Cymro Cymraeg Mike Peters fel prif leisydd, sef ‘Eiliadau fel hyn’, ac un gân gan yr hen grŵp ‘Gwacamoli’, sef ‘Cwmwl nawr’. Un o’r uchafbwyntiau sy’n amlwg yn destun balchder mawr i Lisa, oedd canu cân a gyfansoddwyd gan Cerys Mathews, ond nad yw wedi recordio ei hun, sef ‘Dyma’r Amser’. Cafodd Lisa ganiatâd arbennig gan Cerys i recordio’r gân. Yn ôl ei arfer, Duncan oedd yn cyfeilio iddi ar y gitâr a’i fysedd meistrolgar yn asio i’r dim gyda naws teimladol canu Lisa. Ynghyd â chyflwyniad naturiol a chartrefol Lisa, bu’n noson bleserus iawn.
Diolch i Dylan’s a’r merched Liz a Bethan (Cymunedau yn Gyntaf) am gefnogi’r noson. Diolch i’r ffyddloniaid a fentrodd mas a gobeithio dônt â ffrind gyda nhw y tro nesaf bydd y Fenter yn trefnu digwyddiad Cymreig yn yr ardal.
 Noson Cwis gyda Brigyn - Clwb Rygbi Castell-neddCafwyd noson arall i ddysgwyr Castell-nedd Port Talbot yng nghlwb rygbi Castell-nedd yn ddiweddar. Daeth dros ddeugain o ddysgwyr a Chymry Cymraeg ynghyd i gymryd rhan mewn cwis lluniau ac i wrando ar y ddeuawd Brigyn yn canu rhai o’u caneuon newydd yn ogystal â hen ffefrynnau. Diddanwyd y gynulleidfa gymysg gyda chaneuon acwstig megis ‘Bohemia Bach’, ‘Bysedd yn dy Wallt’, eu teyrnged i’r paffiwr Johnny Owen, ‘Y Sgwâr’ a’r fersiwn hyfryd o glasur Leonard Cohen, ‘Haleliwia’. Cafodd pawb noson i’w chofio, gyda nifer o’r gynulleidfa yn bachu copi o albwm newydd y brodyr o Lanrug, ‘Brigyn 3’. Cafwyd enillwyr y raffl gyfle euraidd i wella eu Cymraeg yn ogystal wrth iddynt ennill ‘Scrabble’ yn Gymraeg, felly mae gan y tiwtoriaid disgwyliadau mawr yn barod i’r tymor nesa’. Edrycha’r is-bwyllgor dysgwyr ymlaen at ddigwyddiadau sydd i ddod y tymor nesaf. CWIS CARIADTrefnwyd noson o adloniant yng Nghlwb Rygbi Castell-nedd ar nos Wener, 25 Ionawr ble ddaeth tua 50 o ddysgwyr a Chymry Cymraeg yr ardal i ddathlu diwrnod Santes Dwynwen.
I ddechrau’r noson cafwyd Cwis Cariad dan ofal Alun Pugh o’r Fenter Iaith gyda chwestiynau ar ganeuon serch Cymraeg a Saesneg a pharatowyd gan Glynis Williams.
Cafwyd tipyn o sbri yn ystod y sesiwn, ambell un yn meddwl taw noson ‘karaoke’ oed hi! Yn fuddugol, criw o ferched sydd yn dysgu Cymraeg yng Nghastell-nedd. Da iawn chi.
Yn dilyn y cwis bu Lisa Pedrick yn swyno’r gynulleidfa gyda pherfformiad gwych o ganeuon serch ag ysgrifennwyd gan Lisa ei hun. Noson wych arall a threfnwyd gan Is-bwyllgor Dysgwyr y Fenter a ma’ ddiolch mawr yn mynd iddyn nhw.
| Bore Coffi'r Fenter Cynhelir Bore
Coffi bob bore Mercher yng nghaffi'r Willow Grove, Castell-nedd
rhwng 10.30 a 11.30 o'r gloch. Caffi dim ysmygu yw hwn ac y mae
bore coffi'r fenter yn cyfarfod yn yr ystafell gefn. Estynnir croeso
cynnes i Gymry Cymraeg, Cymry ail-iaith a Dysgwyr, felly galwch
draw am ddisgled a chlonc. |
|
 |
Croeso yng Nghastell Nedd
Bydd criw o bobl yn cyfarfod yn wythnosol bob bore Sadwrn yng Nghanolfan
Coleg Castell-nedd Port Talbot, Stryd y Frenhines, Castell-nedd.
Cynhelir pob math o ddigwyddiadau yno, e.e. siaradwyr, cwis, ond
prif nod y cyfarfodydd yw bod dysgwyr yn cael y cyfle i gymysgu
gyda'i gilydd a hefyd gyda Chymry Cymraeg. Felly, os ydych yn ddysgwr/wraig
neu'n siarad Cymraeg fel iaith gyntaf, dewch draw am sgwrs a disgled
o 10.30 y bore tan tua 12 o'r gloch. Mae yna groeso cynnes i bawb.
CYD
Mae cangen CYD yn cwrdd bob nos Iau am 8 o'r gloch yng Nghlwb Rygbi
Castell-nedd. Am fwy o fanylion cysylltwch â'r fenter ar 01792
864949.
|
|
Swyddog Datblygu CYD
i Gwm Tawe
Mae John Dixon wedi cael ei benodi’n Swyddog
Datblygu CYD yng Nghaerfyrddin a Chwm Tawe. Mae John o Gaerdydd
yn enedigol, a dysgodd e'r Gymraeg yn y 70'au cynnar. 'Roedd
e'n byw yn Ninas Powys, ym Mro Morgannwg tan 1991, pan symudodd
e a'i deulu i fyw yn ardal Llanpumsaint. Tan yn ddiweddar,
bu'n gweithio i gwmni ymgynghori rhyngwladol, ond mae bellach yn
gweithio rhan amser i CYD a rhan amser ar ei liwt ei hun fel ymgynghorydd.
Mae hefyd yn gwneud rhywfaint o gyfieithu, ac yn diwtor dosbarth
Cymraeg i Oedolion yn Alltwalis. Mae ei wraig, Fran, hithau
wedi dysgu'r Gymraeg trwy gwrs Wlpan, hefyd yn y 70'au, ac mae ganddynt
dri o blant.
Mae e wrthi ar hyn o bryd yn cwrdd â'r gwahanol grwpiau ac
aelodau CYD yn ei ardal, ac yn gobeithio cychwyn grwpiau newydd
yn y dyfodol agos hefyd. Mae'n bwriadu cyd-weithio yn agos
gyda'r gwahanol fentrau iaith er mwyn gwneud y gorau o'r adnoddau
prin sydd ar gael.
|
| |
|
|
|
|
