Mae Bwrdd yr Iaith Gymraeg wedi cynhyrchu pecyn o ganeuon gwreiddiol gan Martin Geraint i gyflwyno’r Gymraeg i blant bach a’u rhieni. Mae’r pecyn hefyd yn cynnwys llyfr llywio a thaflen sydd yn cynnwys geiriau’r CD. Os ydych yn dymuno cael copi yn rhad ac am ddim, cysylltwch â swyddfa’r Fenter cyn gynted â phosib.

Yn dilyn llwyddiant y gystadleuaeth llynedd gyda disgyblion Blwyddyn 7 Ysgol Gyfun Ystalyfera, penderfynwyd ymestyn y gystadleuaeth eleni i gynnwys ysgolion cynradd yr ardal.
Derbyniwyd nifer fawr o gardiau oddi wrth yr ysgolion canlynol:- Pontardawe, Trebannws, Y Wern, Y Glyn, Tyle’r Ynn a Blaendulais.
Diolch yn fawr i bawb a gymerodd rhan ac i’r ysgolion am eu cefnogaeth unwaith eto.

Dyma enillwyr y gystadleuaeth :
Y Wern: Mai Watkins
Tyle'r Ynn: Katie Miller
Y Glyn: Simone Anthony
Pontardawe: Holly Bale
Blaendulais: Nia Sarah Williams
Trebannws: Caitlin Lewis

Lansiwyd gwasanaeth cynradd y Llinell Cefnogi Gwaith Cartref gan Fwrdd yr Iaith Gymraeg yn Nhachwedd 2005. Nod y Llinell, sydd yn cael ei rhedeg gan Fenter Môn fel rhan o wasanaeth y Llinell Gyswllt, yw cynnig cefnogaeth i rieni a phlant sydd yn derbyn addysg cyfrwng Cymraeg neu ddwyieithog. Mae'r gwasanaeth yn darparu:
· cymorth gyda geirfa neu dermau Cymraeg
· cymorth ymarferol ar faterion cyffredinol yn ymwneud â helpu gyda gwaith cartref cyfrwng Cymraeg.

Mae'r gwasanaeth ar gael o Ddydd Sul i Ddydd Gwener o 3.00 o'r gloch hyd 9.00 yr hwyr.

Gellir cysylltu drwy ffonio 0871 230 0029
neu e-bostio post@gwaithcartref.

Roedd Menter Iaith Castell Nedd Port Talbot yn falch iawn i gael gwahoddiad i fod yn un o ddarparwyr clwb ar ôl ysgol newydd yn Ysgol y Glyn, Brynaman. Cysylltodd yr ysgol a'r Fenter Iaith i'w hysbysu fod yr ysgol am ddechrau clwb Cymreictod i annog a rhoi cyfle i'r disgyblion ddefnyddio'r Iaith Gymraeg tu allan i oriau'r ysgol mewn modd cymdeithasol a hwyl. Roedd y bartneriaeth gyda'r Fenter Iaith yn un berffaith felly. Mae'r plant yn gwneud amryw o sesiynau yn y clwb megis coginio ayb, ond sesiynau chwaraeon a gemau bu'r Fenter Iaith yn ei ddarparu. Mae'r disgyblion wrth eu bodd yn chwarae gemau megis 'Dodgeball', hoci, pêl rhwyd, Pêl y Brenin, gemau dan do a llawer mwy, a hyn oll drwy gyfrwng y Gymraeg. Hoffai'r Fenter Iaith ddiolch i'r ysgol am y gwahoddiad ac am y cyfle i gydweithio gyda'r bobl ifanc.