Yn dilyn cytundeb gyda thîm rhanbarthol y Gweilch, mae’r Fenter Iaith wedi bod yn gyfrifol am drefnu erthyglau dwyieithog sydd wedi ymddangos o fewn rhaglenni bob gêm gartref.
Dyma’r erthyglau mwyaf diweddar:-

Blwyddyn Newydd Dda!

Allai’m meddwl am well ffordd i groesawu’r flwyddyn newydd na gwylio’r Gleision yn ‘hedfan’ tua’r Gweilch, a’r Gweilch yn troi’n ‘Las’ wrth geisio curo tîm y brif ddinas!

Wastad yn gêm anodd i’w rhagweld – weithiau heb lawer o rygbi’n digwydd, gall fod yn siomedig a dirdynnol, bob tro’n wrthdrawiadol. Ond mae yna ymroddiad pur sy’n gwneud i fi a’m tad anghofio popeth sy’n digwydd yn y byd. Mae’n ryddhad, 80 munud o ddim byd ond rygbi. Gweiddi – ar y chwaraewyr, ac ar ein gilydd! Ni yw’r arbenigwyr, gallen ni hyfforddi Cymru! ’Dyn ni’n ei garu!

Os nad yw’r ornest ei hun yn gymhelliad, mae sylweddoli y gallai, mewn ’chydig dros fis, rhyw 25 o’r chwaraewyr ar faes y Liberty heddiw fod yn cyfnewid eu siwmperi rhanbarthol am un coch yn ‘Twickers ey what”. Nifer o anafiadau, sy’n creu cyfleoedd i eraill. Chwarae i’r tîm a disgleirio fel unigolyn.

Mae’r enwau heddiw’n fy atgoffa o un o’m hoff ornest fel plentyn, y Probables v y Possibles. Ydych chi’n eu cofio? Roberts, Shanklin, Cooper, G. Jenkins yn erbyn Biggar, Hook, J Thomas a’r criw. Dewiswch eich dau set o XV.

Dim llawer o obaith gweld hynny’n digwydd gyda’r rhaglen fel ag y mae. Mae’r gêm yn newid mor gyflym, y chwaraewyr yn enfawr a’r “gwrthdrawiadau’n” wirioneddol beryglus.

Mae problem ’da S4C heddiw hefyd. Pan fydd Jerry Collins yn taclo Jamie Roberts, sut fydd hi’n bosibl cael “dryll” y dyn o’r Gweilch a “gen” y dyn o’r Gleision i’r un shot? Bydd rhaid defnyddio lens ongl lydan.

Mwynhewch! Gan ddymuno i chi i gyd 2010 hapus a iach.

Geth

Cwestiwn ag Ateb!
Enw: Rhydian Roberts
Dyddiad Geni:14/02/1983
Pentref Genedigol: Pontsenni, Powys

1.Pryd ddechreuodd eich diddordeb mewn rygbi?
Pan ro' ni tua 3 oed fe ddechreuodd y diddordeb mewn rygbi. Roedd yr awydd i chwarae yn fy ngwaed. Roedd fy mrawd hŷn yn chwarae rygbi felly roedd hynny’n help, ac roedd fy nhad yn gefnogwr mawr o’r gêm.

2.Beth yw eich atgof cyntaf o rygbi?
Gwylio Paul Thorburn yn trosi cic gosb tu fewn hanner ei hun! Es i allan i’r cae agosaf i ymarfer ddydd a nos, gan freuddwydio am chwarae i Gymru un diwrnod!

3.Pwy oedd dy arwyr yn y byd rygbi?
Mae yna sawl un rwyf yn edmygu dros y blynyddoedd. Roeddwn yn hoff iawn o Vainga Tuigamala, Jonah Lomu a Scott Gibbs. Mewn geiriau arall, y ‘beef cakes’ â chyflymdra!

4.Os na fyset wedi dioddef yr anaf a wnaeth ddiweddu dy yrfa rygbi, lle wyt ti’n meddwl byddet ti nawr?
Wel, fyswn yn bendant wedi parhau i ymgeisio i wisgo’r crys coch! Ond os fyswn wedi llwyddo mae hynny’n fater arall! I fod yn chwaraewr rygbi proffesiynol oedd y freuddwyd, ond wedyn efallai na fyswn wedi cael y cyfle i fod yn ganwr, ac rwyf wrth fy modd yn canu. Os fyswn wedi gwrando ar be roedd y ddynes gyrfau yn ei ddweud fe fyddwn yn 'nanny' neu yn swyddog carchar!!

5.Wyt ti’n mynd i wylio unrhyw un o’r gemau chwe gwlad eleni?
Rwyf wedi cadw blychau yn fy nyddiadur er mwyn gallu gwylio pob un o gemau Cymru. Rwyf hyd yn oed wedi gohirio cyngerdd yn California oherwydd ei fod yn gwrthdaro gyda gem Cymru a Lloegr!

6.Beth yn dy farn di ydi’r tebygrwydd o Gymru’n ennill y Gamp Lawn eleni, a pwy eu bygythiad mwyaf?
Rwy’n credu bod ganddynt gymaint o siawns a phawb arall. Mae gennym y dalent a thîm hyfforddi arbennig felly prawf o gryfder meddyliol ydyw a’r dyfalbarhad i lwyddo. Y Gwyddelod a’r Ffrancwyr yw’r bygythiad!

7.Pa chwaraewr wyt ti’n credu bydd yn serennu dros Gymru yn y twrnamaint?
Does dim gwahaniaeth gen i i fod yn onest. Cyn belled a bod y garfan yn chwarae fel uned, mi fydd pob un yn serennu yn y diwedd pan fyddwn yn codi’r gwpan. Dyna sy’n cyfri!

8.Sut deimlad yw hi i ganu o flaen miloedd yn Stadiwm y Mileniwm?
Anhygoel! Y stadiwm gorau yn y byd i ganu ynddo! Does dim yn curo Stadiwm y Mileniwm!

9.Wyt ti’n credu bod gan y Gweilch siawns o ennill y bencampwriaeth eleni, yn ogystal â’r EDF a Chwpan Heineken?
Rwy’n sicr yn gobeithio! Rwyf wedi rhoi arian arnynt i ennill!

10.Yn olaf, ac yn bwysicach oll, pwy sydd am ennill yma heddiw?
Ymddiheuriadau i unrhyw gefnogwr Leeds sy’n darllen hyn, ond… Y Gweilch wrth gwrs! Gobeithio bydd y gêm yn un da i’w gwylio!

Mae gemau’r penwythnos yma yn dangos pa mor anodd yw hi i’r chwaraewyr a’r cefnogwyr gyda threfn y tymor y dyddiau yma i ranbarthau Cymru. Mae’r gwahanol gystadlaethau mor wasgaredig bellach nes ei bod yn amhosib bron gwybod beth yw beth , ac mae’r gêm hon heno yn enghraifft berffaith o hynny. Munster, y pencampwyr, yn ymweld â’r Liberty. Achlysur mawr, achlysur pwysig. Ond hon yw’r gêm gyntaf i’r Gweilch yng Nghynghrair Magners ers diwedd mis Hydref, bum wythnos gyfan yn ôl, a fydd dim un arall am dair wythnos arall pan fydd y Gweilch yn ymweld â Pharc y Scarlets ar Ŵyl San Steffan.

Un dracht o’r Magners yw’r penwythnos hwn felly i holl dimoedd y Cynghrair Celtaidd, ar ôl mis cyfan ar y llwyfan rhyngwladol ac ar drothwy pythefnos o emau hollbwysig yn Ewrop, ac mae’n ddilema i’r hyfforddwyr. A oes disgwyl er enghraifft i fechgyn fel Ryan Jones ac Alun Wyn Jones allu rhoi o’u gore ar ôl pedair gem ryngwladol hynod o gorfforol mewn pedair wythnos? Gellid gofyn yr un cwestiwn am Gethin Jenkins a Jamie Roberts gyda’r Gleision; Stephen Jones a Mathew Rees gyda’r Scarlets a Luke Charteris gyda’r Dreigiau. Yn amlwg, mae ‘na demtasiwn i roi hoe iddyn nhw dros y penwythnos hwn, i wneud yn siŵr eu bod nhw wedi dad flino’n llwyr ac yn llawn egni a brwdfrydedd unwaith eto wrth gamu ymlaen at bythefnos allweddol yng Nghwpan Heineken Ewrop. Ond ar y llaw arall, mae her y Cynghrair Celtaidd yn fwy fyth eleni gyda’r drefn newydd. Pob tîm yn anelu am y pedwar ucha' er mwyn bod yno ar gyfer y “play off” ar ddiwedd y tymor. Ond i dimoedd Cymru - y ffactor ychwanegol y tymor hwn o geisio osgoi bod yr isa’ o’r pedwar rhanbarth, neu bydd ‘na ddim lle yn y brif gystadleuaeth yn Ewrop y tymor nesa .Felly, rhaid canolbwyntio ar y penwythnos hwn hefyd, ac mae’r cefnogwyr yn disgwyl gweld y tîm cryfa’ ar y cae bob Sadwrn, yn enwedig wrth groesawu tîm mor nerthol a deniadol a’r Pencampwyr o Orllewin yr Ynys Werdd.

Beth felly yw’r ateb? I fi, y drefn ddelfrydol fydda hon: Chware gemau’r Cynghrair Celtaidd i gyd ym misoedd cyntaf y tymor i orffen erbyn diwedd Ionawr ar ôl rhoi bwlch am dair gem ryngwladol ym Mis Tachwedd. Dechrau Cwpan Ewrop wedyn a chynnal y gemau hynny i gyd wedyn yn un bloc gyda’i gilydd, ac yna cael Pencampwriaeth y Chwe Gwlad yn glo ar y tymor cyn mentro bant ar deithiau’r Haf. I fi, mae hynny’n gwneud synnwyr - y tymor wedi ei strwythuro fel bod pawb yn gwybod ble maen nhw; y cyffro yn y gwahanol gystadlaethau yn cynyddu o Sadwrn i Sadwrn heb fwlch, a’r gwahanol gyfnodau yn gam ymlaen gyda’r safon yn codi’n gyson wrth i’r tymor fynd rhagddo. Syniad da? Ie medda fi - ond go brin y caiff e byth mo’i dderbyn!