Mae Rhydian Roberts fwyaf adnabyddus am ymddangos yn y bedwaredd gyfres o 'The X Factor' pan ddaeth yn ail. Canwr operatig Cymraeg o Bontsenni ydyw sydd eisoes wedi canu yn Stadiwm y Mileniwm wedi'r Gamp Lawn yn 2008 ac yn ddiweddar yn ystod gemau Rhyngwladol yr Hydref. Cafodd Menter Iaith Castell-nedd Port Talbot y fraint o holi Rhydian am ei gariad at fyd y bêl hirgron.

Cliciwch ar 'Rygbi'r Gweilch' ar yr ochr chwith er mwyn darllen mwy am Rhydian.

Yn ôl y llun, byddech yn meddwl bod Cymdeithas Edward Llwyd wedi trefnu taith gerdded i Begwn y De!
Anodd credu mai Tramffordd Benwyllt bu rhai o aelodau'r gymdeithas yn ogystal ag aelodau'r Fenter Iaith yn cerdded dydd Sadwrn, 9 Ionawr 2010 yn rhan o Daith Gerdded o Benwyllt i gopa Fan Gynhirych gan gerdded drwy weddillion diwydiannol yr ardal.
Hoffai'r Fenter Iaith ddiolch i Arwel Michael am arwain y daith ac am ei gydweithrediad.
Mae'r Fenter Iaith yn bwriadu cydweithio gyda'r Gymdeithas eto yn y dyfodol agos, fe fydd manylion pellach ar ein gwefan / digwyddiadur maes o law.

Cynhaliwyd Gig y Gwach Santes Dwynwen ar nos Wener 22 Ionawr yng Nghwmni y fythol wyrdd Heather Jones a Steffan Huw, dyn ifanc o Gaerdydd, a braf dweud i fod y Gwachel dan ei sang.
Yn gyntaf ar y llwyfan oedd Steffan Huw yn berfformio set hyfryd gan ganu ambell gân gariadus i ddathlu’r wŷl. Dychwelodd Heather Jones unwaith eto i lwyfan y Gwachel i orffen y noson gyda set wych. Roedd pawb wedi mwynhau’r gerddoriaeth a chafwyd noson lwyddiannus unwaith yn rhagor.
Gigs y Gwach i ddod:-
Nos Iau, 18 Chwefror – Al Lewis a’r Band + Gildas
Nos Iau, 18 Mawrth – Steve Eves a’r Band + Alltud

Cynhaliwyd cwis Nadolig y Fenter ar nos Lun, 28 Rhagfyr yng Nghlwb Rygbi’r Alltwen. Penderfynwyd bod elw’r noson yn mynd tuag at Ty Hafan. Buom yn ffodus iawn i gael Alun Wyn Bevan yn gwis feistr unwaith eto.
Daeth tua 100 o bobl i’r cwis eleni, a braf oedd gweld nifer o ddysgwyr a phobl ifanc yn bresennol. Cafwyd 4 rownd o gwestiynau ar ddigwyddiadau neu bersonoliaethau amlwg yn 2009, y rhan fwyaf ohonom yn gwybod yr atebion ond methu yn llwyr a chofio ar y noson! Bu cystadlu brwd ac ambell i ddadl am yr ateb cywir, ond wedi cwblhau’r rowndiau i gyd, y tîm ar y brig oedd “Merched Bobby”.

Alun Pugh, Prif Swyddog y Fenter ddaeth a’r noson i ben drwy ddiolch i bawb am eu presenoldeb ac i Alun Wyn Bevan am arwain y noson mor dda. Cyflwynwyd swm o £20 i gapten y tîm buddugol ond fe ofynnwyd i’r Fenter ddanfon y wobr tuag at Dŷ Hafan.

Llongyfarchiadau a diolch unwaith eto i dîm “Merched Bobby” am eu haelioni, a diolch yn fawr i bob un o’r timau a gymerodd rhan, Clwb Rygbi yr Alltwen am y croeso ac i Alun Wyn Bevan am roi noson pendronid, hwylus arall i drigolion yr ardal.